الشاعر / رماح ابنعوف
وقتين الجيت ونقرت الباب
وقتين الجيت ونقرت الباب
صاح كنتي هناك
بس كان لااابته
ومن خلف الحجاب
****
وما طالت وقفتي في بابك
قام جاني جنا الريد مرسالك
لبسني وشاح الحب وترحاب
****
خشيت مدهوش
بمعنى الحوش
اقدامي احسها ما هيلي
مرات ثابت وكم مرا بدوش
متكبكب وختلفة الاسباب
****
جيت عندك وكنت افصح مخلوق
كان عندي لغات ٣ حلوق
فتشت الكلمات عشان تمرق
اتغزل ساي .. لو فيكي يحوق
لا جني حروف ولا جاني لعاب
****
كان يوم الجيت ولقيت عينيك
نصراني وفي يوم التعميد
جهرني وناديتلك يمه
ومن بعدو خلاص.. ما شفت غميد
مديتو لساني علي الاحزان
كان بينا رهان
انا كنت بقول : بلقاك وابقاك
قالت : حتعيش العمر وحيد
كيتا ياحزني بقينا احباب
****
علي كل ياست البنوت
كان يوم من الموت
كان حالة ومازلت بعيشا
كل ما يكلكل اضني الصوت
الشعر الخام.. عضم الاحلام
خلاص ما نام .. الرواء والقوت
وحكاية اشتعلت الحب .. والشباب
****
كان يوم محموم
إتمغن فوقنا سحب وقيوم
قانون الجزب احتار فينا
زي اهل هلال في عز الصوم
رقصن نجمات في السما بالفال
ورمن شبال لي وعد بحوم
في خشم الوجع اتكسر ناب
****
وقتين الجيت ونقرت الباب
شوف عيني الضحكة بقت وردة
والغناء مرسوم في شفة رضاب
النسمة انسابت في شعرك
وابليس زي شفتو اتوضا وتاب
وحدائق بابل نادتبك
واهرام البركل بقو دراب
النيل تسب .. والقيف انماص
والقاش انتفض رملو واغاب
****
انا يومي الجيت.. واتفتح الباب
في الجوف اتفتحن الف سؤال
واتداون في الحال الف كتاب
حسيت القافيه سرت في الدم
واندلقت بينات الاعصاب
غير الاشاعر
دي قريحة جديدة
جرس لاذع
لكن منساب
حسيتني ملكت نواصي القول
وبقيت كاتب
****
يوم جيتك داك .. وبقينا قراب
اتغير جلد الزمن وفنيت
وانتفخت فيني الروح ياداب
